أم الحسن

من طرف **rakss** الخميس أكتوبر 11, 2007 8:24 pm

وقفت بعد حلبت لبينة الشاي تكورك يا الحسن

يا ام الحسن وينو الحسن

لمن صفت رغوة شخيبات اللبن

في حلتا المبني من طبق السكن

واقفي في حوش البهايم ولسع تكورك يا الحسن

جاها حسا من بعيد مارق من القاطوع ورا

قال ليها خير يا الحاجي خير

قالتلو خير تعال لي جاي دايراك تعنون لي جواب

يا الراسي لي ولدي الخدير

لا تبقي زي شافع السرير تقول لي زين آيمة زين

وزين وتبقي بعد شهير

وان جاني يكتب فد سطير

اقولو يا سجم السجم انا زي قرايتك ما قريت

لكن عويناتي بيفرزن الوريقة البيضاء من لون القلم

بعد المغيرب بي شوي جاها الحسن تعبان يسير

دا العشى غنمو من الدرب سرقت ندي وشو الهجير

سوتلو شايا بي لبن قرض معاهو حرف فطير

قالتلو بسم الله قول واكتب وصيتي انا للخدير

الزمن يا ولدي ماحقاهو السنين

البعيش في الدنيا ما بعيش مرتين

العمير فاضلي بس منو اليقين

وانت طول في البنادر يا الحبيب لا متين

تعال اوريك حق ابوك الجم حقيق حاج اللمين

ان عرفتو بلا عمار يقولو ولدا عندو طين

العلاج لا تنسي رسلو لي دحين

العوينات آجناي شوفن ضنين

سلامنا ليك مطرز للبنيات والبنين

ولو الارض يا ولدي تنشال في الايدين

انا كت برسلا ليكا في لوري الخزين .

شاعرها الأستاذ / خالد شقوري

تغني بها المبدع / ود النصري

من طرف **MOHRG** الأحد أكتوبر 21, 2007 1:43 pm

يسلموووووووووووووووووووووو ...............ما اجمل الدارجية في الشعر يقولون اذا احببت ان تبرز في العالمية فعليك اولا ان تتشبع بالمحلية

أم الحسن

أم الحسن

رد: أم الحسن